牛年就到嘞，新春出去玩，一路搵啲靚牛肉歎下，係咪聽落好吸引？全國高速公路從2月11日零時開始對7座(包括7座)以下小型載客車輛免費通行，到節假日最後一天2月17日24：00結束。趁着春節黃金周，喺做好疫情防控嘅基礎上，有序自駕遊。一路上，既有傳統牛肉做法，又有各種國際化創新烹製，令你食指大動。

一路向北：

牛肉乾、牛蹄……大歎靚食材

出遊地：清遠

自駕線路：廣州-廣清高速-清連高速

推薦時間：2〜4天

搵食指南：清遠唔單止有清遠雞，仲有各種牛肉美食。石潭鎮位於清遠市清新區北部，省道S114線貫穿石潭鎮，驅車途中，可欣賞絕美嘅喀斯特地貌。當地特色菜有石潭牛蹄、牛骨髓湯、牛柏葉、大頭菜清蒸牛肉……呢啲特色菜，喺清遠當地網紅景區古龍峽嘅古龍漁莊餐廳，可以一站式品嘗到。

清遠牛蹄

古龍峽繼雲天玻霸、通天神掌、天空之梯、網紅河谷等產品之後，今年春節又推出 「春心蕩漾」「紅牛」「拈花之手」等全新打卡點，遊客可以喺峽谷瀑布、空中雲天玻霸之間影靚相。

古龍峽「春心蕩漾」

古龍大瀑佈下嘅碧綠水潭，一支粉色嘅愛神之箭射向瀑布，取名為「春心蕩漾」。整個項目用浮台嘅原理設計製作，人企喺上面，就好似坐喺船上一樣，會盪來漾去，可以同時容納約100人同時拍照。

「拈花之手」綻放喺古龍瀑布嘅銀色水幕中，與玻璃橋頭通天神掌遙相呼應，以女性嘅芊芊細指為原型，指尖上一朵蘭花亭亭玉立，象徵着一花一世界、一指問雲天。

古龍峽「拈花之手」

「拈花之手」高16米，由中國工藝美術大師李志群歷時半年製作完成，以瀑布為背景凌空而出，期間為觸發製作靈感，李志群曾經尋找一千幾位女性「手模」。「把你捧在手心裏」，「拈花一笑 一笑傾城」……咁美好溫馨嘅寓意，有無吸引到你？

之後再驅車往北前往陽山。陽山小江鎮的牛雜名聲在外，入口軟嫩，新鮮又好味。

豐陽牛肉乾

最後一站到連州。豐陽牛肉乾係連州極具特色的美食，選料精良，選嘅肉必須係脊樑肉和肘子肉。燃料一定要用干透嘅雜木，微火慢熏，烤出來嘅肉乾黃而不焦，香味四溢，再將肉切成薄片，拌以辣椒、豆豉，放喺碟度蒸。食嘅時候輕嚼慢咽，回味無窮。連州燜牛蹄、牛肉蒸連州切粉亦別具特色。有得食有得玩，新春之際，獲得世界上最長玻璃橋健力士紀錄嘅廣東連州擎天玻璃橋上，本地書法家手持大筆，書寫出一幅寬5米、長達168米嘅巨幅春聯迎接新年，為大家送上祝福。

連州擎天玻璃橋

Tips:喺清遠市區，可以選擇清新花園酒店，到古龍峽體驗主題森林客房，或者選擇就近嘅溫泉酒店及民宿。連州當地特色住宿有連州國際大酒店、連州龍潭客棧 、紅樓賓館等，另外當地仲有畔水庭院大夫第等民宿品牌。

粵東潮汕：

一隻牛 精選三成靚肉打邊爐

出遊地：潮汕

自駕線路：廣州-廣河高速-濟廣高速-汕湛高速

推薦時間：3〜5天

搵食指南:喺廣東過年，「十里不同風，百里不同俗」。過年期間，潮汕地區民俗活動非常豐富。當地唔單止風景靚，美食更加係別有滋味。喺潮汕，24小時都可以品嘗到不同風味嘅美食，牛肉火鍋、牛肉丸更加係名聲在外。

潮州菜，食材講究、做工精細，係中國四大菜系之粵菜嘅重要組成部分，已有千年歷史。唔少遊客到潮州古城遊玩之後，習慣過韓江一路向東，去官塘食牛肉。進入G539國道官塘段後，牛肉火鍋店嘅密集程度簡直係一道景觀。 官塘鎮位於潮州市區東南隅10公里處，南面與澄海區隆都鎮接壤。官塘係牛肉市場嘅中心。喺官塘，完善嘅供應鏈讓牛肉火鍋店能夠源源不斷入到最新鮮嘅靚靚牛肉。 牛肉火鍋喺官塘嘅發展，就好似一種集群效應，通過市場嘅良性循環積累起口碑，而家已經發展為地標性美食嘞。

潮汕牛肉火鍋

潮汕牛肉火鍋係從沙茶牛肉演變過來嘅，沙茶牛肉係潮州菜嘅傳統菜，一開始係用沙茶醬汁去煮，後來演變成清湯火鍋。比起精緻嘅擺盤，沙茶牛肉更講究快、薄，既避免手嘅溫度影響到肉質，又保證牛肉下鍋10秒內必熟。優質嘅官塘牛肉火鍋店擅於與時間賽跑。好牛肉除咗鮮，仲需要嫩。一頭牛適合打火鍋嘅肉唔到三成，而呢三成唔到嘅肉，就被精分為嫩肉、肥牛、吊龍等10幾個種類。

食材的搭配，亦大有講究。官塘牛肉火鍋以清湯底為主，平平無奇嘅清湯背後，常常暗藏火鍋店主嘅獨門配方。此外，遊客仲可以食吃到各種牛肉丸、炒粿條等。

潮汕牛肉丸

而喺汕頭，以小公園亭為核心，向昇平、國平、安平路五向輻射，居平、永平、商平等道路環形連接，構成完整系統嘅環形放射狀路網格局。連續不斷嘅騎樓空間、比例協調嘅沿街立面和精雕細刻嘅裝飾細部，係小公園中西合璧嘅顯著表現。喺呢度，仲可以去品嘗達濠魚丸添！

Tips:潮州當地住宿，高端酒店可以選擇潮州臨江酒店、御酒店、韓庭別院度假酒店、太安堂豪生溫泉酒店等，牌坊街周邊還有眾多民宿可供選擇。汕頭嘅高端酒店可以選擇猛獅凱萊酒店 、龍光喜來登酒店、帝豪酒店、君華海逸酒店 、金海灣大酒店等。 

肇慶：

風景同食材都靚到絕

出遊地：肇慶封開

自駕線路： 廣佛肇高速-懷陽高速

推薦時間：2〜3天

搵食指南：肇慶，西江明珠，山清水秀，其風光之旖旎、山巒之奇幻、岩洞之美妙，足可以同廣西桂林媲美。喺肇慶封開，有三道傳統名菜，白切杏花雞、姜蔥羅董牛肉乾、燜蓮都山羊。

封開羅董牛肉乾

羅董牛肉乾，係用封開羅董鎮特有嘅肥美黃牛肉，唔用煙熏火燒，就將肉懸喺自家屋檐下，喺凜冽嘅北風中自然風乾。食用時只需把制好嘅牛肉乾加入姜蔥炒香就可以啦，鮮韌味美，齒頰留香。當地其他特色菜仲有清蒸賀江桂花魚、梅菜滷肉竹篙粉等菜式。一路自駕，仲可以遊覽龍山景區、大斑石景區和千層峰景區，採摘皇帝柑。

旅途中嘅肇慶市區，同樣係一個休閒好去處。春暖星湖，桃花盛開！此外，肇慶市將軍山體育公園二期正式啟用。佢係華南地區最大嘅體育公園，擁有1.8公里嘅環道及無障礙步行道，內圈1.1公里環湖健身步道，以及體育場、全民健身中心等設施。

Tips:黃金周期間，肇慶酒店性價比高。封開當地特色住宿有封開奇境嶺南東方酒店、封開賀江半島酒店等。肇慶嘅特色酒店有肇慶奧威斯酒店、肇慶星湖大酒店等。另外，七星岩等景區周邊高端民宿及短租公寓眾多。

文、圖：廣州日報全媒體文字記者  羅磊 通訊員 柳青 鄧謙 官鍵 黎旭陽   
廣州日報全媒體編輯 鄺白薇