經過成年嘅休養生息，哆頭蟶喺福建莆田特有嘅黑泥裡面吸收充足養分，每一隻都生得肥肥嫩嫩，鮮美無比。哆頭蟶嘅時令季到嘞，一年都只係呢幾個月有得食，一直到8月份。

廣州日報記者了解到，福建莆田哆頭村，係一個有600幾年養蟶歷史嘅海邊小漁村，呢度嘅居民世代養蟶。哆頭嘅灘涂係罕見嘅純黑泥，土質肥沃又無沙，養分又多，據說要上千年先至可以形成咁樣嘅地質。哆頭村兩萬幾畝嘅黑泥灘涂就好似係哆頭蟶生長嘅「溫床」，蟶子吸收得好，自然生得更肥美，一般可以長到6cm左右。哆頭村嘅海水鹹度約18～20度，比一般海水鹹度高，養出來嘅哆頭蟶相當鮮甜，食到嘴裏就更加爽脆滑嫩。哆頭蟶係挖洞高手，為咗吸取灘涂裡面嘅營養，大多要鑽進30cm深嘅黑泥裡面。為咗唔影響黑泥灘涂嘅自然環境，挖蟶嘅工作幾百年來一直堅持徒手進行，唔用任何機械，挖滿一盆哆頭蟶起碼要兩個鐘。

莆田人烹煮哆頭蟶，遵循「簡單即美」嘅原則，突出哆頭蟶獨有嘅鮮甜。莆田餐廳里嘅 「鐵板鹽焗蟶」亦係當地嘅經典做法，保留咗哆頭蟶嘅鮮美原味，花椒點綴其中，帶出獨特香氣。食果時將蟶肉蘸D海鹽，更香！

春夏季節想飲多啲湯，「紅菇鮮蟶湯」就至啱嘞！將山之鮮嘅紅菇與海之鮮嘅哆頭蟶共融一爐，鮮美大大升級。烹調全程就喺檯邊現煮，哆頭蟶鮮活肥嫩睇得見，紅菇嘅香氣越煮越濃。鮮紅嘅湯色，來源於紅菇本身營養豐富嘅天然色素，湯越紅，味越鮮！每隻哆頭蟶吸收曬飽滿嘅湯汁，一啖咬落去，汁液豐盈。

哆頭蟶嘅鮮味與酒香更係絕配，「陳年花雕老酒豎海蟶」係莆田傳統做法，將陳年花雕酒與新鮮嘅海蟶入鍋清蒸，花雕酒激發出蟶肉本身嘅鮮甜，酒香四溢。入夏後來一份「冰爽酒糟蟶」，酒糟帶有淡淡嘅酒香，味道悠長，將哆頭蟶嘅「鮮」帶曬出來。

廣州日報全媒體文字記者：曾繁瑩
廣州日報全媒體圖片記者：曾繁瑩 部分圖片由受訪者提供
廣州日報全媒體視頻記者：曾繁瑩
廣州日報全媒體編輯：鄺白薇