俗話講「食在廣州，味在番禺」，番禺嘅美食和歷史一樣沉澱下來。扒金山、鹹水餃、蒸燒賣、姜埋奶……各式各樣嘅番禺美食都有一個特點——「物美價廉」，今次我哋就去睇下，人民幣一百蚊，可以喺番禺食到幾多美食呢？

中華美食城位於南村鎮興南大道，整體格調以嶺南水鄉文化為主，匯聚咗粵、魯、川、蘇、湘、浙、閩、徽菜系，係廣州市打造嘅美食天堂區，係呢度，集聚各地特色美食，可以食勻中國嘅東西南北風味。

·北院

北院係一間東北菜館，一行入去，就見到大紅色調嘅裝修風格，紅色嘅掛燈、窗戶、菜牌……好喜慶，體現咗北方人嘅熱情豪爽。

喺東北有句俗話：「坐着不如倒着，吃的不如餃子」，餃子係北方人逢年過節、迎親待友必備嘅食物。點一份白菜肉餃，一隻隻肥肥白白嘅餃子，餡料好足，一啖咬落去，好味到停唔到口，實惠又美味，盛惠人民幣25元一份。

東北三省仲有一種非常流行嘅傳統小吃——韭菜盒子，係以韭菜、雞蛋、麵皮作為主要材料製作而成嘅美食。一層金黃色的酥脆麵皮，包裹著韭菜和雞蛋粒，香口，唔肥膩，口感相當好。不過餡心有啲散，食嘅時候要小心自己件衫。人民幣12元一份，一份有兩個。

吃完兩份麵食，有啲口渴叻，點份粥潤下喉，呢度嘅小米粥係以小米為主要食材熬制而成，呈金黃色，口味清淡，健胃消食。

北方嘅小米粥係唔放調味嘅，食慣粥嘅廣東街坊可能有啲唔習慣，偶爾嘗試一下又幾新鮮，感覺更能品嘗出米香味哦。人民幣4元一碗，抵食。

·汕頭賢砂鍋粥

呢間砂鍋粥老店開咗有七年，老闆係潮汕人，為咗確保食材新鮮，店家每日凌晨四點半就去市場採購。老闆話：「夜晚好多人來食宵夜，有八成客人都會點一份砂鍋粥和一碟滷水拼盤。」

熱辣辣嘅一鍋鮮蝦砂鍋粥，擺上檯嘅時候，砂鍋裡面仲喺度冒泡泡，香噴噴，好滋味！而且，重點係裏面嘅料好足，隨便舀一勺，就有幾隻大蝦。點一份細份嘅砂鍋粥，就夠兩三人嘅分量叻。人民幣59元一份，夠三個人食用，人均20蚊。

潮汕滷水天下聞，接落來就係重頭戲嘞——滷水拼盤，據說係潮州菜宴席中嘅首道菜，俗話說「先入為主」，食客通常會以滷水拼盤作為評判潮汕菜嘅水平。拼盤裡有滷水鵝、掌翼、大腸、豆腐片等，量很足，幾個人都夠食，人民幣43元一份。

地址：番禺區南村鎮興南大道塘步東

來源：微社區e家通活力南村
廣州日報全媒體編輯：鄺白薇