好多人話廣州人最講究五味調和

酸、甜、苦、辣、咸

每種味道都可以玩出各種花樣

並且以最完美嘅狀態呈現

酸得來唔會太勁，甘而不厭，苦而不澀

辛而不辣，鹹淡適宜……

老廣嘅五味已經漸漸由一種味覺變成一種記憶

每一味都對應著某啲特定嘅食物

分門別類收納喺記憶庫裏面

  酸  

酸味係一種爽快刺激嘅體驗

每次一諗到呢種味道，瞬間口齒生津

對於廣州人來講

酸味嘅傑出代表係「咸酸」

常見於街頭巷尾嘅食雜店

尤其係老城區和古港村落裏面

喺見證廣州「海上絲綢之路」嘅黃埔古港

有咁樣一家咸酸

酸蘿蔔、酸黃瓜、酸木瓜、腌楊桃……

裝喺玻璃樽裏面，任君選擇

一打開蓋，就會控制唔到唾液分泌……

堅持用時令蔬果腌制咸酸

10蚊（人民幣，下同）一斤，一碗4蚊，價格非常感人~

青瓜脆，蘿蔔爽，楊桃軟

如果咁啱有啲飽飽滯滯，來一碗

即時感覺清爽開胃，身心舒暢~

·金姨咸酸

地址：海珠區琶洲街石基村西堤1號

  甜  

甜味大概是五味中最讓人愉悅嘅一種

深藏於老城區窄巷裡頭嘅老廣味糕點

亦係屬於廣州普通市民嘅一份甜蜜炸彈

蓮姐的糕係每日現做嘅

每日1點半準時出爐，晏晝3點半開始出攤

一共有14種糕點

蘿蔔糕、芋頭糕、紅豆糕、馬蹄糕……

基本以甜糕為主

水晶餅和艾糍按個賣

艾糍1蚊1個，水晶餅1個只要5毫！

卷卷和塊狀嘅糕點都係論斤計算

價格公道，基本上係10蚊1斤

年糕和椰汁糕呢類白糕稍稍貴1蚊

塊狀嘅糕係現買現切嘅，要幾多切幾多

雜糧卷裏面有燕麥和紅豆

超級足料，放喺手上相當「墜手」

紅豆綿，燕麥香，搭配Q彈嘅糕一齊食

甜而不膩，口感超級豐富

如果住喺附近，肯定日日買返去做早餐

·老廣味糕點店

營業時間：下午3點半開檔，賣完即止

地址：海珠區基立南街16號(近前進路)

年代感、好懷舊，係佢嘅關鍵詞

芬芳嘅糖不甩，外表金黃金黃

淋上黃糖漿和香脆嘅芝麻花生粒，仲隻隻都好大粒添

一啖咬落去，啲紅糖味爆出來

糯米丸就綿密有嚼頭，芝麻餡非常濃香

加上表面嘅花生碎粒添口感，正！

一碟甜度啱啱好，不會太膩

·芬芳甜品

地址：同福東路619號（市二宮D口）

 苦 

苦味係五味中最不受待見嘅一味

但如果無咗佢，人生都會唔健全

廣東人對熱氣呢個詞有好深嘅執念

於是，涼茶、苦瓜呢類食物

就成為老廣生活裡面嘅一大恩物

喺海珠同福路龍溪首約

有一間老式涼茶鋪——林氏涼茶

21年無休，用瓦煲煲涼茶

老闆娘林姐是一位和善嘅人

每日就好似師奶煲湯咁樣煲涼茶

店裡面有十幾個瓦煲

涼茶鋪唔「涼」，就好似一間桑拿房

每日大量熬煮，處理嘅藥渣都要按桶計算

飲林姐嘅涼茶，要先「問診」，再配茶

有街坊話細細個就開始飲

睇著從7蚊雞一杯，到而家10蚊/杯、20蚊/瓶

雖然價格隨年月漸漲，但涼茶依然有效

唔理係熱氣還是感冒，一般飲兩次就好返嘞

同平常喺屋企煲嘅涼茶唔一樣

林姐嘅涼茶更多咗啲中藥嘅意味

先含一下再吞，等涼茶停留喺條脷度耐一啲

「啊~苦！」但係，咁樣先至係我哋廣州嘅涼茶啊！

苦口良藥利於病~

·林氏涼茶

地址：海珠區同福路龍溪首約50后座

 辣 

辣係五味之中最特別嘅一種存在

因為佢係一種痛覺而唔係味覺

老廣嘅辣唔四川、重慶果啲麻辣咁刺激

而係多咗一重養生嘅意味

因為主角通常係姜

豬腳姜又叫姜醋

係廣州人冬天嘅滋補好物之一

對於女生來講，仲係一流嘅保養品添

食完一大碗，滿足感絕對爆棚！

膠質豐富嘅豬腳

簡直係膠原蛋白嘅代名詞

煮得超級軟爛，輕輕一夾就斷

糯糯嘅口感，冇得彈～

·老牌耕田公

地址：海珠區洪德路56號

 咸 

終於講到最後一味——咸

鹹味應該係五味中最基礎嘅味道

我哋日常生活中都需要佢

粵菜中嘅鹹味菜實在係太太太多啦

其中，燒臘算得上係經典

廣州似乎係一座被燒臘包圍嘅城市

叉燒、燒鵝、燒肉、燒排骨……

甚至連廣東嘅阿爸阿媽鬧仔金句都係——

「生舊叉燒好過生你，叉燒仲可以飽肚」

每天下午4點

呢家燒臘店就開始排隊

燒肉皮脆肉靚，肥瘦正好，一啲都唔膩

啱出爐嘅時候皮超級脆，而且仲有肉汁！

·森成美食店

地址：海珠區南華西路73號

以上就是廣州人餐桌上最常見嘅五味

正係呢五味，酸甜苦辣咸

將昇斗市民平淡嘅生活調和得有滋有味

陪伴著老廣州度過一個又一個

「一日三餐和四季」

五味俱全成就百樣人生

來源：海珠融媒體中心
廣州日報全媒體編輯：鄺白薇