去睇藝術展「打卡」，汲取藝術養分嘅同時，快速「出片」喺社交媒體分享……深受年輕潮人喜愛。但其實如果將市區藝術館嘅背景換成灰牆青磚、古村小巷嘅優美鄉村，係咪反而另有一番風情呢？

喺花都區嘅塱頭古村，就可以邂逅廣州雕塑院院長、國家一級美術師許鴻飛嘅雕塑藝術作品。鄉村+藝術，將傳統和現代藝術相結合會碰撞出點樣嘅火花？不妨跟我哋一齊去睇下。

許鴻飛雕塑藝術作品

在塱頭古村一字排開嘅祠堂建筑前，藝術風格濃郁嘅雕塑作品非常引人矚目。遊客陳小姐表示，冇諗到許鴻飛藝術大師趣味十足嘅雕塑可以同廣州嘅鄉村結合得咁和諧，白色、金色嘅雕塑以塱頭古村裡特色嘅灰牆、綠色荷塘為背景，相映成趣，「呢度肯定會成為廣州鄉村裡面嘅網紅打卡點。」

「藝術回歸田園，快樂裝點生活」，許鴻飛雕塑作品喺美麗鄉村展出，亦係意在用雕塑獨有嘅審美特徵為鄉村營造藝術文化氛圍，激發市民出遊意願。喺塱頭古村之後，許鴻飛雕塑藝術作品將陸續喺花都區紅山村、番禺區大嶺村、新水坑村、江鷗村、北村和增城區番豐村等多個文化旅遊特色村進行巡展，之後仲計劃喺全國百村巡展。

許鴻飛雕塑藝術作品喺塱頭村展出。

品讀歷史建築：

每一塊祠堂磚瓦都喺度講述古老故事

第一眼見到塱頭古村嘅古建築，就覺得呢啲建築裡邊，肯定藏著許多故事。對充滿好奇心的年輕人來講，想要真正讀懂呢座村落，需要親自深入到果一座座飽經風雨嘅歷史建築，聆聽每一塊磚瓦所講述嘅古老故事。

塱頭村作為廣州兩個「中國歷史文化名村」之一，係廣州現保存規模最大、極具嶺南特色嘅廣府古村落，距今已有600幾年歷史。呢度保存著完整嘅明清青磚建築388座，村中有30幾座祠堂書室。經過重新改造之後，呢啲古老建築煥發出更吸引人嘅生命力，非常適合喺閑暇嘅午後，慢慢逛、慢慢睇，一步一步解讀村落嘅「文化密碼」。

踏入由老屋小院改嘅「慧德書院」，會忍不住低聲驚呼「真係不可思議！」古建築中嘅小院經過精心打理，又不乏「拙樸」嘅味道，從「觀古知今思進退、讀書養志識春秋」等對聯以及牆上歷史名人名言警句，會發現呢個小小院落處處流露「文化傳承」嘅痕跡。

塱头古村極具嶺南特色。

廣州日報記者了解到，唔單只係慧德書院，塱頭村有好多歷史建築，譬如谷詒書室、南野公書舍等，喺「活化」之後，都更好咁承擔起激活村落「文脈」嘅作用。喺積墨巷最北，就是古村落中規模最大嘅家族住宅群「積墨樓」。「積墨」原意為層層加墨，係中國傳統國畫嘅一個手法，引申意思就係希望後代認真讀書、出人頭地。積墨樓係黃谷詒居住及存放財務嘅房屋，左邊四座是黃谷詒三個考取功名嘅兒子及黃谷詒本人所居住，右邊四座係其餘四名兒子嘅居所。牆角採用花崗岩石腳，高達2.2米，一個成年人企喺果度，伸手都掂唔到邊。據塱頭村嘅導遊介紹，古時候官階越高，石腳越高，從呢啲房屋細節，遊客可以讀到好多有趣嘅文化和習俗。

塱头古村

就算漫無目的喺古建築小道隨意「亂逛」，也會不時撞到令人驚喜嘅「打卡」點，譬如一面繁茂花牆，或者一扇在門縫中透出蔥蘢綠意嘅木門，都可以成為你影靚相拍照嘅絕佳佈景。

空氣清新嘆「氧吧」

著件古裝影靚相 碧葉連天變背景

走入塱頭村，好多遊客深呼吸之後會感慨：「空氣實在係太好嘞！」

的確，遠離鬧市嘅塱頭村就好似一個天然「氧吧」，蔥蘢樹木環繞四周，滿眼綠意令人沉醉。護村池塘已經係蓮葉接天，喺燦爛陽光下，都以為自己行入咗一個唯美嘅巨幅畫卷。

面對咁樣嘅天然美景，自然不好錯過成為「畫中人」嘅機會。廣州日報記者喺現場看到，好多年輕女仔身著五彩斑斕嘅飄逸漢服，撐著古香古色嘅油紙傘，喺池塘中央嘅小道上排成長列，擺出各种唔同造型影相。喺呢個靚靚佈景之中，出片效果非常正。

空氣清新，碧葉連天。

【塱頭古村遊玩攻略】

自駕車：廣州市區-廣清高速-新華第二出口往炭步方向-風神大道-花港大道-車城大道-東風路-東風大橋-寶珠路-塱頭村，全程約1小時。

公共交通：搭乘花15路喺塱頭村站落車，步行五六百米就到。

開放時間：每日8：30-17：30。

遊覽須知：根據塱頭古村遊覽須知，古村日接待量唔超過日正常遊客量嘅20%，即600人。進入古村前需檢測體溫，提供穗康碼，遊客佩戴口罩喺古村內遊覽，保持一定間隔。

·同場加映：廣州其他古韻特色鄉村

從化錢崗村：

錢崗村距今已有800幾年歷史，古巷以鵝暖石鋪砌，現存嘅房屋絕大多數為明代所建，係保存較為完整嘅廣府民居，其中廣裕祠係國家重點文物保護單位。唔少戶外愛好者都鐘意喺呢度打卡，可以行下「錢崗村-溪頭村-蓮麻村-錢崗村」嘅古驛道路線，呢條古驛道串起好多古村古宅，沿途可探索歷史文化。

交通：廣州地鐵14號線到太平站，轉乘從化5路公交到太平公交總站，轉車遼專線到錢崗古村下車。

         自駕車從廣州市區上北二環高速-太和站出口-鍾落潭方向-105國道（從化方向）-太和收費站-太平鎮（廣裕祠指示牌）-錢崗古村，車程約1小時。

番禺大嶺村：

「中國歷史文化名村」大嶺村建村至今已有近九百年歷史，背依菩山，三面環玉帶河。來到呢條村，會發現有各式古石橋跨於河上。村裡祠堂、牌坊、古樹、蚝殼牆隨處可見，古建築多運用灰塑、磚雕、石雕等傳統工藝，如今仍保存完好，極具特色。

交通：地鐵4號線到石碁站，轉番126路公交到大嶺村站下。

黃埔古港村：

依靠著黃埔古港，呢個地處琶洲區域嘅古村落鬧中取靜，好方便到達。祠堂文化係呢個古村嘅特色之一，曾經舉行過多次嶺南祠堂節，至今仍有唔少古色古香嘅祠堂。漫步於黃埔古村落嘅各個祠堂間，可以了解唔同祠堂嘅故事。呢度嘅姜撞奶、艇仔粥，係遊客必嘗美食。

交通：乘坐有軌電車或地鐵至萬勝圍站，換乘旅遊3線或旅遊1線可達，公交229路亦可抵達。

廣州日報全媒體文字記者 陳馨 陳薇薇
廣州日報全媒體圖片記者 陳馨 陳薇薇 王燕
廣州日報全媒體編輯 鄺白薇